இன்று ஒரு தகவல்

ரயில் நிலையங்களில் நெரிசலைக் குறைக்க 'யாத்ரி சுவிதா கேந்திரா' திட்டம் - முதல் கட்டமாக டெல்லியில் அறிமுகம்!

இந்திய ரயில் நிலையங்களில் கூட்ட நெரிசலைக் குறைத்து, பயணிகளுக்குச் சிரமமில்லாத மற்றும் பாதுகாப்பான பயணத்தை உறுதிசெய்யும் விதமாக 'யாத்ரி சுவிதா கேந்திரா' என்ற புதிய திட்டத்தை ரயில்வே துறை அறிமுகப்படுத்தியுள்ளது.

திட்டத்தின் முக்கிய அம்சங்கள்:

பிரத்யேக நுழைவாயில்: இந்தத் திட்டத்தின் மிக முக்கிய அம்சம், முன்பதிவு செய்த பயணிகளுக்கு (Reserved Passengers) மட்டுமே பிரத்யேக நுழைவாயில் வசதி ஏற்படுத்தப்படுவதுதான். இதன்மூலம் டிக்கெட் முன்பதிவு செய்தவர்கள் நேரடியாக பிளாட்பாரத்திற்குச் செல்ல முடியும்.

அங்கீகாரம் கட்டாயம்: முன்பதிவு செய்யாத பயணிகள், வியாபாரிகள் அல்லது ரயில்வேயில் தொடர்பில்லாதவர்கள் நேரடியாக ரயில் நிலையத்திற்குள் நுழைய முடியாது. கடை வைத்திருப்போர், ஒப்பந்ததாரர்கள், வியாபாரிகள் மற்றும் ரயில்வே பணியாளர்கள் ஆகியோருக்கும் தனித்துவமான அடையாள அட்டைகள் (Unique Identity Cards) வழங்கப்படும். இந்த அங்கீகரிக்கப்பட்ட நபர்கள் மட்டுமே பிளாட்பாரத்திற்குள் அனுமதிக்கப்படுவர்.

டெல்லியில் துவக்கம்:

இந்த முன்னோடித் திட்டம், இந்தியாவில் முதன்முறையாக டெல்லி ரயில் நிலையத்தில் சுமார் 5,281 சதுர மீட்டர் பரப்பளவில் பிரம்மாண்டமாகத் தொடங்கப்பட்டுள்ளது. இந்த மையத்தில் பயணிகளின் வசதிக்காக 120 இருக்கைகள், 25 தானியங்கி டிக்கெட் இயந்திரங்கள், 22 டிக்கெட் கவுன்டர்கள், வைஃபை, ஆர்.ஓ. குடிநீர் மற்றும் கழிப்பறை வசதிகளுடன் 17 சிசிடிவி கேமராக்கள் மற்றும் 5 லக்கேஜ் ஸ்கேனர்களும் இடம்பெற்றுள்ளன.

நாடு முழுவதும் விரிவாக்கம்:

மத்திய அரசு, இந்தப் பாதுகாப்பு மற்றும் வசதி சார்ந்த திட்டத்தை இந்தியா முழுவதும் கூட்ட நெரிசல் மிகுந்த 76 முக்கிய ரயில் நிலையங்களில் விரிவுபடுத்தத் திட்டமிட்டுள்ளது. இதில், சென்னை எழும்பூர், திருப்பதி, பாட்னா, மும்பை, புவனேஸ்வர், குவஹாத்தி, ஹவுரா, கோரக்பூர் போன்ற முக்கிய நிலையங்களும் அடங்கும்.