இரா. முருகன் (1953 - 2026) : வணக்கத்துடன் ஒரு அஞ்சலி!!
இரா. முருகன் அவர்களை என்னைப் போல ஒரு தீவிர சக சுஜாதா வாசகராக மட்டுமே முதலில் அறிவேன். அவருடைய புத்தகங்களை / நடையை சுஜாதா சிலாகித்து சுட்டிக்காட்டியிருக்கிறார்.
நான் ஆரம்பத்தில் அவருடைய புத்தகங்களைப் படித்திருக்கவில்லை. A Wednesday என்கிற ஹிந்திப் படத்தை கமல் தமிழில் 'உன்னைப் போல் ஒருவன் (2009)' என்று எடுத்தபோது, அதன் வசனத்தை இரா. முருகன் அவர்கள்தான் எழுதினார். அதில் வந்த இவருடைய வசனம், "மறதி ஒரு தேசிய வியாதி" மிகப் புகழ்பெற்றது. அதன் பிறகு அஜித் நடித்த பில்லா-2 படத்தின் வசனத்தை இவர் எழுதினார். பிறகு, அவரை ஒரு வசனகர்த்தாவாக எந்த இயக்குனரும் ஏனோ பயன்படுத்தவில்லை.
இடைப்பட்ட காலத்தில் இவருடைய புத்தகங்கள் சிலவற்றை [பகல் பத்து ராப்பத்து (குறுநாவல் தொகுதி), ராயர் காப்பி கிளப் (கட்டுரைத் தொகுதி), அரசூர் வம்சம் (நாவல்)] படிக்க முடிந்தது. அவர் தன்னுடைய சில நாவல்கள் மேஜிக்கல் ரியலிசம் வகையைச் சார்ந்தவை என்று குறிப்பிடுவார். எனக்கு அதுபற்றிய அறிவு கம்மி என்பதால் நான் எதுவும் கமெண்ட் செய்யவில்லை.
சாகித்ய அகாதெமி வெளியீடாக இந்திய இலக்கிய சிற்பிகள் வரிசையில் இவர் எழுதிய சுஜாதா என்கிற (சிறு) புத்தகத்தைப் பற்றி முகநூலில் நான் என்னுடைய 'அறிவுஜீவி சுஜாதா வாசகர்கள் குழு"வில் விமர்சனம் எழுதியபோது, எனக்கு ஒரு குறுந்தகவல் அனுப்பினார். என்னுடைய மொபைல் எண்ணைக் கேட்டிருந்தார். நான் உடனடியாக அவருக்குப் பதில் அனுப்பியவுடன், என்னை அழைத்துப் பேசினார். சுமார் பத்து நிமிடங்கள்....கிட்டத்தட்ட 9 நிமிடங்கள் சுஜாதா அவர்களைப் பற்றியே பேச்சு இருந்தது.
பிறகு நான் சுஜாதா அவர்களின் படைப்புகள் பற்றி எழுதிய என்னுடைய இரண்டு நூல்களைப் (சுஜாதா: எழுத்தின் கோட்பாடு மற்றும் சுஜாதா:நவீனத்தின் நாயகன்) பற்றி குறிப்பிட்டபோது, "முடிஞ்சா எனக்கும் அனுப்புங்களேன். படிக்கிறேன்" என்றார்.
சுஜாதா மறைவுக்குப் (Feb 2008) பிறகு, 2014-ம் ஆண்டு, புதிய தலைமுறை இதழில் இரா. முருகன், "சுஜாதா நினைவைக் கொண்டாடுவது எப்படி" என்று ஒரு கட்டுரை எழுதினார். நான் அதைப் படித்தவுடன், முகநூலில், "அறிவுஜீவி சுஜாதா குழு"வில் பதில் எழுதியிருந்தேன். அந்தப் பதிவை அவருக்கு யாரோ சொல்லியிருக்க வேண்டும். அதைப் பற்றியும் சில நிமிடங்கள் பேசினோம். அவ்வளவுதான்.
துரதிருஷ்டவசமாக, சுஜாதா படைப்புகள் பற்றிய என்னுடைய நூல்களை இரா. முருகன் அவர்களுக்கு அனுப்ப மறந்துவிட்டேன். இப்போது அவரும் மறைந்து விட்டார்.
