இயற்கை உணவுக் குறிப்பு-11: "துளசி தீர்த்தம்"

துளசி தீர்த்தம் மனித மூளைக்கு திண்மை கொடுக்கக்கூடிய அபாரமான மருந்து. துளசி இலையை ஒரு டம்ளரில் போட்டு ஊறவைத்து, அந்தத் தண்ணீரைக் குடித்து வந்தால் மூளை பலம் பெறும்.

இயற்கை உணவுக் குறிப்பு-10: "முடக்கத்தான்"

உடல் வலி, மூட்டுவலி, மூட்டுப் பிடிப்பு, இடுப்புப் பிடிப்பு, கைகால் மூட்டுக்களில் ஏற்படும் வலி, இடுப்பு வலி, கழுத்து வலி போன்றவற்றைப் போக்க எளிய, சிறந்த முறை முடக்கத்தானைப் பயன்படுத்துவதே.

இதனுடைய இலைகளையும், கைகளையும் துண்டுகளாக்கி, நீரில் போட்டு வேக வைத்து, அந்த நீருடன் மிளகுத்தூள், உப்பு சேர்த்து அருந்தலாம். இந்த முடக்கத்தான் சூப்பை அதிகாலை அரை டம்ளர் அளவு பருகினால் நாட்பட்ட பாரிச வாயு குணமாகும்.

இரசம் செய்யும்போது புளி, தக்காளி, காய்ந்த மிளகாய் வற்றல், கொத்தமல்லி இலை போன்றவற்றை முடக்கத்தான் சூப்புடன் கலந்து இரசம் தயாரித்து உணவுடன் கலந்து உண்ணலாம்.

அரிசி, கஞ்சி அல்லது மாற்ற தானியக் கஞ்சி தயாரிக்கும்போது, அதனுடன் முடக்கத்தான் இலைகள், தண்டுகளை வெட்டிப்போட்டு தாயாரித்துக் குடிக்கலாம்.

வீட்டில் வைக்கும் குழம்புகளிலும். முடக்கத்தான் இலைகள், தண்டு போன்றவற்றை வெட்டிப்போட்டு தயார் செய்து சாதத்துடன் கலந்து உண்ணலாம்.

நன்றி: அருள்நிதி எம்.பி.பாலா அவர்கள் "இயற்கை மருத்துவம்" மாத இதழில் (ஆகஸ்ட் 2009) எழுதிய "முடக்கத்தான் கீரை" என்ற கட்டுரையின் அடிப்படையில்.

இயற்கை உணவுக் குறிப்பு-9: "முட்டைக்கோஸ்"

முட்டைக்கோசில் உள்ள தழைச்சத்தும், நார்ச்சத்தும் உணவின் பருமனைக்கூட்டி பெருங்குடலையும், மலக்குடலையும் நன்கு வேலை செய்யச் செய்கின்றன. இதனால் மலம் இலகுவாகக் கழிவதுடன், மூலம், பவுந்திரம் போன்ற ஆசனவாய்க் கோளாறுகள் வராமல் தடுக்கப்படுகின்றன.

இதில் 'டார்ட்டாரிக்' அமிலம் இருப்பதால், தேவைக்கு அதிகமாக உண்ணப்படும் மாவுப் பொருட்கள் கொழுப்பாக மாறாமல் தடுக்கப்படுகின்றன.

வயிற்றுப்புண் உள்ளவர்கள் வேலைக்கு மூன்று அவுன்ஸ் வீதம் ஒரு நாளைக்கு மூன்று அல்லது நான்கு முறை முட்டைக்கோசு சாறு அருந்தி காரம், புளி சேர்க்காமல் உணவுண்டு வந்தால் குணமாகும்.

- 'இயற்கை மருத்துவ' மாத இதழில் அருள்நிதி எம்.பி.பாலா அவர்கள் எழுதிய "முட்டைக்கோசு' கட்டுரையிலிருந்து ஒரு பகுதி.

நன்றி: அருள்நிதி எம்.பி.பாலா அவர்கள் மற்றும் 'இயற்கை மருத்துவம்' மாத இதழ்.

இயற்கை உணவுக் குறிப்பு-8: "புதினா"

புதினாக் கீரையை நன்றாகக் கழுவிவிட்டு, மென்று சாப்பிட்டால் நாக்கிலுள்ள சுவை நரம்புகள் புத்துணர்வு பெறும். பல் ஈறு நோய்கள், பல் விழுவது போன்ற பல் தொடர்பான நோய்களுக்கு இது சிறந்த மருந்து. மேலும் வயிறு உப்புசம், பித்தம், வாயுத்தொல்லைகள் , ஜீரணசக்திக் குறைவு ஆகியற்றுக்கும் புதினா ஒரு சிறந்த மருந்து. சாப்பாட்டில் புதினாத் துவையலை சேர்த்துக் கொள்வது நல்லது.

இயற்கை உணவுக் குறிப்பு-7: "மாதுளைச்சாறு"

மாதுளைச்சாறு தொடர்ந்து பருகுவது இரத்த அழுத்தத்தைக் குறைக்கும். வேண்டாத கொழுப்பைக் கரைக்கும். உடலிலுள்ள நச்சுப்பொருட்களை வெளியேற்றும்.

இயற்கை உணவுக் குறிப்பு-6: "வேப்பம்பூ"

வேப்பம்பூவிற்கு இரத்தத்தை சுத்தம் செய்யும் ஆற்றல் உண்டு. மேலும் பித்தத்தை தணிக்கவும் செய்யும். எனவே வாரம் ஒரு முறையோ அல்லது பத்து நாட்களுக்கு ஒரு முறையோ வீட்டில் வேப்பம்பூ ரசம் வைத்து சாப்பிடலாம்.

இயற்கை உணவுக் குறிப்பு-5: "அவல் பயிர்க் கலவை"

நன்றாக ஊறவைத்த அவலுடன், முளைகட்டிய பாசிப்பயறு, சீரகத்தூள், மிளகுத்தூள் மற்றும் தேங்காய்த்துருவல் கலந்து, மேலும் சிறிது நேரம் ஊற வைக்க வேண்டும். சுவையான, சத்து நிறைந்த அவல் பயிர்க்கலவை தயார்.

இயற்கை உணவுக் குறிப்பு-4: கார அவல்"

நன்றாக கல் நீக்கி சுத்தம் செய்த அவலை நீரில் தேவையான பக்குவத்தில் ஊறவிடவும். நீர் சேர்த்த அவலுடன் தேங்காய் துருவல், வெட்டிய கொத்தமல்லி இலை, கறிவேப்பிலை, புதினா சேர்க்கவும். எலுமிச்சைச்சாறு, மிளகுத்தூள், சீரகத்தூள், இந்துப்பு தேவையான அளவு சேர்த்து நன்றாக கலக்கவும். கார அவல் சாப்பிடத் தயார்.

கார அவல் தயாரிப்பது சுலபம். சத்து மிகுந்த இந்த உணவை சர்க்கரை வியாதி அன்பர்களும் அளவாகச் சாப்பிடலாம். மலச்சிக்கல் நீங்கும். பசிப்பிணி தீரும். உடல் சதை குறையும். இயற்கை நலவாழ்வு முகாம்களில் இவ்வுணவு வழங்கப்படுகிறது.

இயற்கை உணவுக் குறிப்பு-3: "ராகிப் புட்டு"

கேழ்வரகை எட்டு மணி நேரம் ஊறவைத்து, இடித்துச் சலித்த மாவில், தேங்காய்த்துருவல், வெல்லம் சேர்த்துக் குழாயிலோ, இட்லிப்பானையிலோ வேகவைத்துத் தயாரிக்கலாம். இது இனிப்புப் புட்டு.

ராகி மாவுடன் தேங்காய்த்துருவல், மிளகுத்தூள் சேர்த்துத் தயாரித்தால் அது காரப்புட்டு ஆகும்.

நன்றி: "இயற்கை நாதம்", அக்டோபர் 2008, ஆடுதுறை இயற்கை மருத்துவ சங்க வெளியீடு.

இயற்கை உணவுக் குறிப்பு--2: "தக்காளி தயிர் பச்சடி"

தக்காளி மிக மலிவாகக் கிடைக்கும் காலத்திற்கேற்ற எளிய இயற்கை உணவு இது. இதைத் தயாரிக்கத் தேவையான பொருட்கள் : நான்கு தக்காளி, மிளகு சில, அரை கப் தேங்காய்த் துருவல், இரண்டு கப் தயிர், கொத்தமல்லி இல்லை, உப்பு.

தக்காளியை நன்றாக அரைக்கவும். அத்துடன் போடி செய்த மிளகு, தேங்காய்த் துருவல், கொத்தமல்லி இல்லை இவை அனைத்தையும் நைசாக அரைக்கவும். இந்தக் கலவையை அப்படியே தயிரில் கலக்கவும். தக்காளிப் பச்சடி தயார்.

இயற்கை உணவுக் குறிப்பு-1: "இயற்கை இட்லி"

அவலை ரவா போல் உடைத்து, இளநீர் அல்லது கோதுமைப் புல் சாறு கலந்து, கெட்டியாகப் பிசைந்து, இட்லி தட்டில் தட்டி வைக்க வேண்டும். இருபது நிமிடத்தில் இட்லி வடிவத்தில் இருக்கும்; வேக வைக்கவேண்டியதில்லை.
நன்றி: இயற்கை நாதம், மாத இதழ், செப்டம்பர் 2008. (ஆடுதுறை இயற்கை மருத்துவ சங்க வெளியீடு).