மலைக்கோயிலுக்கு
மாலை போட்டார்
மச்சுவீட்டு அண்ணாச்சி
கள்ளச்சாராயம்,
கட்டப்பஞ்சாயத்து,
தண்டல், கரைவேட்டி,
இவைகளுக்கு நடுவே
தலைவருக்குப் பாதுகாப்பாக
தானும் உடன்செல்ல.
இரண்டுமுறை குளியல்
நாற்பதுநாள் விரதம்
இலையில் சாப்பாடு
தண்ணி கவிச்சிக்கு விடுப்பு
புதிய காவி வேட்டி துண்டு
மாருலே சந்தனம், நீறு
தினம் பாட்டு, பஜனை.
முதல் பத்துநாள்
வாய் திறக்காத அண்ணாச்சி
மெதுவாய் சரணம் என்றார்
பஜனையில் தாளம் போட்டார்
பார்க்கும் எல்லோரையும்
சாமி என்று கூப்பிட்டார்.
நாற்பது நாட்களில்
முற்றிலுமாய் மாறிப்போனார்
கோபம் கெட்டவார்த்தைகள்
எங்கோ காணாது போச்சு.
நானும் மாற்றிக்கொண்டேன்
சடங்கு, சம்பிரதாயம்,
வடிவம், உள்ளீடு பற்றிய
என் மதிப்பீடுகளை.
என் தாய்மொழி தமிழுக்கென்றே இவ்வலைப்பூ. எனது எண்ணங்கள், எனக்குப் பிடித்த கருத்துக்கள், கவிதைகள், கதைகள் மற்றும் என்னை ஈர்த்த செய்திகள், நாட்டுநடப்புகள், நம் அனைவரின் வாழ்வோடு தொடர்புடைய மற்றனைத்தும் இதில் இடம் பெறும். (பின்புலப் புகைப்படத்தை எடுத்த ஜோன் சல்லிவனுக்கும், அதை வழங்கிய பப்ளிக்-டொமைன்-ஃபோட்டோஸ்.காமிற்கும் நன்றி)
கருத்துகள் இல்லை:
கருத்துரையிடுக