திருவள்ளுவர் தினம்

இன்று திருவள்ளுவர் தினம். அய்யன் என்றும், செந்நாப்போதார் என்றும், தெய்வப்புலவர் என்றும் அவர் புகழ் பாடுகிறோம். தமிழ் மறை என்றும், உலகப் பொது மறை என்றும் அவர் படைத்த திருக்குறளைப் போற்றி மகிழ்கின்றோம். அவருக்குச் சிலைகள் சமைத்தும், நினைவுச் சின்னங்கள் எழுப்பியும் கொண்டாடுகின்றோம். வள்ளுவன் தன்னை உலகினுக்கே தந்து வான்புகழ் கொண்ட தமிழ்நாடு என்று பெருமிதப்படுகிறோம். அனைத்தும் நன்று. அதில் மாறுபட்ட கருத்த இருப்பதிற்கில்லை. ஆனாலும் அடிப்படையாக ஒன்றை நாம் மறந்துவிட்டோமோ?

மாணவர்களை, குழந்தைகளை திருக்குறளை மனப்பாடம் செய்வித்து அவர்களுக்கு பரிசுகள் வழங்கிப் பாராட்டுகின்றோம். 1330 குறளையும் மனப்பாடம் செய்யும் திறன் படைத்த குழந்தைகளைப் பெரிதும் பாராட்டிப் பரிசுகள் வழங்குகின்றோம். (ஆமாம், குழந்தைகள் ஏன் காமத்துப்பாலையும் படிக்க வேண்டும், மனப்பாடம் செய்யவேண்டும்? உரிய வயதில், உரிய காலத்தில் படித்தால் போதாதா? ).

அவர் நினைவைப் போற்ற இவற்றைவிட வேறு சிறந்த வழியில்லையா?

தமிழ் மறை என்கிறோம், அதை ஓதி உணர்ந்தோமா? சரியாகப் புரிந்துகொண்டு அவற்றை அன்றாட வாழ்வில் கடைப்பிடிக்கிறோமா? திருக்குறள் ஒரு வாழ்கலை நூல். அன்றாட வாழ்க்கையை நாம் எப்படி வாழவேண்டும் என்று வழிகாட்டும் ஒப்பற்ற நூல். அப்படி இருக்க நாம் ஏன் அதன் மேன்மையான கருத்துக்களை மனதிற்கொண்டு, அவற்றின்படி ஒழுகுவதில்லை? இந்தக் கேள்வி அனைத்துத் தமிழருக்கும்தான், நான் உட்பட.

ஒரு சில ஒப்பற்ற குறள்களை மட்டுமாவது சரியாகப் புரிந்துகொண்டு, அவற்றின்படி நடந்தால் மட்டுமே திருவள்ளுவருக்குப் பெருமை சேர்ப்பதாக இருக்க முடியும்.

வெறுமனே மேலோட்டமாக அவர் புகழ் பாடிவிட்டு, எதிர்மறையாகச் செயல்படுவது அவரைக் கேலி செய்வதாக ஆகாதா? உதாரணமாக,

"அறன்ஈனும் இன்பமும் ஈனும் திறனறிந்து
தீதின்றி வந்த பொருள்"

அறவழியில், தம் திறமையினால், யாருக்கும் தீங்கிழைக்காது ஈட்டிய பொருள் மட்டுமே இன்பத்தைத் தரும். சரிதானே?

ஆனால் நம்மில் எத்தனை பேர் இதைக் கடைப்பிடிக்கிறோம்? இப்படி சொல்லிக் கொண்டே போகலாம்.

காலம் தாழ்ந்துவிட்டது, என்றாலும் நான் சிந்திக்க ஆரம்பித்துவிட்டேன். நீங்கள் என்ன செய்யப் போகிறீர்கள்?

பொங்கல் வாழ்த்துக்கள்!

அனைவருக்கும் இதயங்கனிந்த பொங்கல் நல்வாழ்த்துக்கள் - சூரி

திருப்பள்ளியெழுச்சி-10:

புவனியிற் போய்ப் பிறவாமையின் நாள் நாம்
போக்குகின்றோம் அவமே இந்தப்பூமி
சிவனுய்யக் கொள்கின்றவாறென்று நோக்கித்
திருப்பெருந்துறை உறைவாய் திருமாலாம்
அவன் விருப்பெய்தவும் மலரவன் ஆசைப்
பாடவும் நின் அலர்ந்த மெய்க்கருணையும் நீயும்
அவனியிற் புகுந்தெமை ஆட்கொள்ள வல்லாய்
ஆரமுதே பள்ளி எழுந்தருளாயே.

திருப்பள்ளியெழுச்சி நிறைவு பெற்றது.

திருப்பாவை-30:

வங்கக்கடல் கடைந்த மாதவனைக் கேசவனை
திங்கள் திருமுகத்துச் சேயிழையார் சென்றிறைஞ்சி
அங்கப்பறை கொண்ட ஆற்றை அணிபுதுவைப்
பைங்கமலத் தண்தெரியல் பட்டர்பிரான் கோதை சொன்ன
சங்கத் தமிழ்மாலை முப்பதும் தப்பாமே
இங்குப் பரிசுரைப்பார் ஈரிரண்டு மால்வரைத் தோள்
செங்கண் திருமுகத்துச் செல்லத் திருமாலால்
எங்கும் திருவருள் பெற்றின்புறுவர் எம்பாவாய்.


திருப்பாவை நிறைவு பெற்றது.

திருப்பள்ளியெழுச்சி-9:

விண்ணகத் தேவரும் நண்ணவும் மாட்டா
விழுப்பொருளே உன்தொழுப்படி யோங்கள்
மண்ணகத்தே வந்து வாழச் செய்தானே
வண் திருப்பெருந்துறையாய் வழியடியோம்
கண்ணகத்தே நின்று களிதரு தேனே
கடலமுதே கரும்பே விரும்படியார்
எண்ணகத்தாய் உலகுக்கு உயிரானாய்
எம்பெருமான் பள்ளி எழுந்தருளாயே.

திருப்பாவை-29:

சிற்றஞ் சிறுகாலே வந்துன்னைச் சேவித்து உன்
பொற்றாமரையடியே போற்றும் பொருள் கேளாய்
பெற்றம் மேய்த்துண்ணும் குளத்தில் பிறந்து நீ
குற்றேவல் எங்களைக் கொள்ளாமல் போகாது
இற்றைப் பறைகொள்வான் அன்றுகாண் கோவிந்தா
எற்றைக்கும் ஏழேழ் பிறவிக்கும் உன் தன்னோடு
உற்றோமே ஆவோம் உனக்கே ஆட்செய்வோம்
மற்றை நம் காமங்கள் மாற்றேலோர் எம்பாவாய்.

தேடல்-2: "தங்க நகரம் டிம்பக்டு"

நேற்று டிஸ்கவரி சானலில் காலை "Into the Unknown with Josh Bernstein" என்ற வரிசையில் தங்க நகரமான டிம்பக்டுவைத் தேடி அவர் மேற்கொண்ட பயணம் குறித்த சுவையான நிகழ்ச்சியைப் பார்த்தேன். (ஜனவரி 12, 2010 - காலை 9 மணி முதல் 10 மணி வரை).

சென்ற வாரம் (ஜனவரி 9, 2010) நோவாவின் பேழையைத் தேடி ஆர்மீனியா, இஸ்ரேல், சிசிலி, சைப்ரஸ் சென்ற ஜோஷ், இம்முறை தங்கத்தைத் தேடி சஹாரா பாலைவனம், மாலி, கினி, தங்க நகரம் டிம்பக்டு, ஜெனி சென்றார். இந்த நாடுகளையும், ஊர்களையும் நேரில் பார்ப்பதுபோல் படம் பிடித்துள்ளனர்.

சுவாரஸ்யமான இந்த நிகழ்ச்சியிலிருந்து பல செய்திகளை அறிந்துகொள்ள முடிந்தது.

மேற்கு ஆப்பிரிக்காவின், மாலி நாட்டிலுள்ள ஊர், டிம்பக்டு. ஒரு காலத்தில் ஓஹோ என்று கொடிகட்டிப் பறந்த நகரம். உலகத்தின் தங்கத்தில் மூன்றில் இரண்டு பங்கு மேற்கு ஆப்பிரிக்காவிலிருந்து கிடைத்தது. மேற்கு ஆப்பிரிக்காவின் தங்கச் சுரங்கங்கள் நிறைந்த ஊர் டிம்பக்டு.

பதினான்காம் நூற்றாண்டில் மாலி சாம்ராஜ்யத்தை ஆண்ட மன்னன் மன்ஸா மூஸா. இவரது மற்றொரு பெயர் கங்கன் மூஸா. தங்கப் பிரியரான இவர் மெக்காவிற்கு புனித யாத்திரை சென்றபோது, சென்ற இடமெல்லாம் தங்கத்தை வாரியிறைத்துச் செலவு செய்தார். ஆயிரம் டன் அளவில் அவரிடம் தங்கம் இருந்ததாகக் கூறப்படுகிறது. புனித யாத்திரையின் போது ஏழை எளியவர்க்கு மட்டும் இரண்டு டன் தங்கத்தை வழங்கியதாகக் கூறப்படுகிறது.

ஜோஷ் டிம்பக்டூவை சுற்றிப் பார்க்கிறார். தற்போதும் அங்கு மக்கள் தங்கத்தைத் தேடுகின்றனர். எப்போதாவது சிறு துகள்கள் மட்டுமே கிடைக்கின்றன. ஜோஷ் ஒரு பழைய முப்பதடி ஆழமுள்ள, குறுகிய ஆபத்தான சுரங்கத்தில் இறங்கி அங்கிருந்து மண்ணைத் தோண்டி மேலே அனுப்புகிறார். அங்குள்ள பெண்கள் அந்த மண்ணை சலிக்க ஒரு துகள் தங்கம் அகப்படுகிறது. டிம்பக்டூவிலிருந்து எங்கே சென்றது அத்தனை தங்கமும் ?

அடுத்து ஜோஷ் ஜெனி நகருக்குச் செல்கிறார். அங்குதான் மன்னரின் தங்கப் பட்டறைகள் இருந்தன. ஜெனி ஒரு முக்கிய வணிகத்தலம். அங்குள்ள நோமா பழங்குடியினர் தங்க வேலைப்பாடுகளில் சிறந்து விளங்கினர். ஜோஷ் அங்கே ஒரு தங்கப் பட்டறைக்குச் செல்கிறார். தங்க ஆபரணங்கள் செய்யப்படுவதைப் பார்க்கிறார். தேடிவந்ததன் நினைவாக தான் கண்டெடுத்த தங்கத் துகளிலிருந்து ஒரு சிறு தங்கக் கம்பி செய்து வாங்கிக் கொள்கிறார்.

ஒரு காலத்தில் தங்கத்திற்கு உள்ள மதிப்பு உப்பிற்கும் இருந்தது. தங்கம் நிறையக் கிடைத்தது. ஆனால் உப்போ கிடைக்காத ஒன்று. வெளிநாட்டில் இருந்து கொண்டுவரப்பட வேண்டிய ஒன்று. தங்கமும் உப்பும் பண்டமாற்று செய்யப்பட்டன. உப்பிற்கு அங்கே வெள்ளைத் தங்கம் என்று பெயர்.

பதினாறாம் நூற்றாண்டில் மொராக்கோவை ஆண்ட மன்னர் சுல்தான் அஹ்மத் அல் மன்சூர் தன நாட்டைப் பொருளாதாரச் சிக்கல்களிடமிருந்து மீட்க தங்க நகரங்களான டிம்பக்டூவையும், ஜெனியையும் கைப்பற்றினார். மாலியின் தங்கம் மொரோக்கோ சென்றது. இன்னும் எவ்வளவோ...

இன்னும் படங்களுடன் நிறைய விபரங்கள் அறியவிரும்புவோர் கீழ்க்கண்ட தளங்களில் காணலாம்:

டிம்பக்டு பற்றி:

http://www.history.com/classroom/unesco/timbuktu/mansamoussa.html

http://en.wikipedia.org/wiki/Timbuktu

ஜெனி நகரைப் பற்றி:

http://en.wikipedia.org/wiki/Djenn%C3%A9

மன்னர் மன்ஸா மூஸா பற்றி:
http://www.blackhistorypages.net/pages/mansamusa.php
http://en.wikipedia.org/wiki/Mansa_Musa


துவாரக் பழங்குடியினர் பற்றி:

http://en.wikipedia.org/wiki/Tuareg

மொராக்கோ மன்னர் அஹ்மத் அல் மன்சூர் பற்றி:

http://en.wikipedia.org/wiki/Ahmad_I_al-Mansur_Saadi

ஜோஷ் பெர்ச்டீனின் டிம்பக்டு ஸ்லைடுஷோ :

http://dsc.discovery.com/tv/josh-bernstein/slide-show/timbuktu.html

நன்றி: டிஸ்கவரி சானல், ஜோஷ் பெர்ன்ஸ்டீன், Black History Pages.net மற்றும் கட்டற்ற கலைக்களஞ்சியமான விக்கீபீடியா

ஸ்ரீ விவேகானந்த ஜெயந்தி

நேற்று ஜனவரி 12-ம் நாள். சுவாமி விவேகானந்தர் பிறந்த நாள். இந்திய அரசு அந்த நாளை தேசிய இளைஞர் தினம் என்று அறிவித்து, நாடெங்கும் கல்வி நிறுவனங்களும், சேவை அமைப்புகளும், விவேகானந்தரின் பக்தர்களும் பல வருடங்களாக அதைக் கொண்டாடி வருகின்றனர். பக்தர்களுக்கு அவர் 'ஸ்ரீ சுவாமிஜி மகாராஜ்' அல்லது சுருக்கமாக 'சுவாமிஜி'.

என் வாழ்வில் பெரிய மாற்றங்களுக்கு முக்கிய காரணம் என் நெஞ்சில் வைத்துப் பூஜித்து வரும் அவர்தான். அவரது படைப்புகளை (Complete Works of Swami Vivaekananda) நம்பமுடியாத மலிவு விலைப் பதிப்பில் முதலில் எட்டு புத்தகங்களாக அத்வைத ஆஸ்ரமம் வெளியிட்டது. (மயிலாப்பூர் ஸ்ரீ ராமகிருஷ்ண மடம் தமிழ்ப் பதிப்பை வெளியிட்டுள்ளது) பிறகு மேற்கொண்டு கிடைத்த, சேகரிக்கப்பட்டவற்றைக் கொண்டு ஒன்பதாவது புத்தகமும் வெளியிடப்பட்டுள்ளது. இவற்றை படிக்க அவகாசமில்லாதவர்களுக்காகவும், இளைஞர்களுக்காகவும், குறிப்பாக மாணவர்களுக்காகவும் "Call to the Nation" என்ற ஒரு அற்புதமான குறுநூல் மலிவுப் பதிப்பாக பல ஆண்டுகளாக விற்பனையாகி வருகிறது. கடைசியாக நான் வாங்கியபோது விலை வெறும் 175 காசுகள் மட்டுமே!

இளைஞர்கள் அவசியம் இந்த நூலை வாங்கிப் படிக்கவேண்டும். சுவாஜியின் ஒப்பற்ற, உற்சாகமூட்டும், தன்னம்பிக்கையூட்டும் மேன்மையான சிந்தனைகளை இந்நூலில் படித்துப் பயன்பெறலாம். மனித மேம்பாடு அறிவியல் அமைப்பின் மூலமாகவும், தனிப்பட்ட முறையிலும் இந்நூலை இளைஞர்கள் பலருக்கு கிடைக்கச் செய்தோம். அதைப்படித்தவர்கள் மனதில் நிச்சயம் நல்லதொரு மாற்றம் ஏற்பட்டிருக்கும் என்று நம்புகிறேன்.

விவேகானந்தரின் ஒரு சிறந்த சிந்தனையுடன் இப்பதிவை நிறைவு செய்கிறேன்:

"ஒரு லட்சியத்தோடு வாழுங்கள். லட்சியவாதி ஆயிரம் பிழைகள் செய்தால், லட்சியம் எதுவும் இல்லாதவன் ஐம்பதாயிரம் பிழைகள் செய்வான். மனிதனுக்கு லட்சியம் மிகவும் அவசியம்."